زیادكردنی بنكەی وەرگرتنی پارەی گەنمی جوتیاران تەوەرێكی كۆبوونەوەكە بوو ئەمڕۆ دووشەممە 2020/5/18، بێگەرد تاڵەبانی، وەزیری كشتوكاڵ و سەرچاوەكانی ئاو پێشوازیكرد لە كەمال مسلیم، وەزیری بازرگانی و پیشەسازی، لەكۆبوونەوەیەك گفتوگۆكرا لەسەر زیادكردنی بنكەی وەرگرتنی گەنمی جوتیاران لە سایلۆكان. لەسەرەتای كۆبوونەوەكە بێگەرد تاڵەبانی، وەزیری كشتوكاڵ و سەرچاوەكانی ئاو دوای بەخێرهاتن باسی لە هەماهەنگی زیاتر كرد لەنێوان هەردوو وەزارەتی تایبەت بە ئاسانكاری بۆ جوتیاران لە وەرگرتنی گەنم لە سایلۆكان و پاراستنی بەرهەمی ناوخۆیی. هەروەها مانەوەی جوتیاران لە بنكەكانی وەرگرتنی گەنم گفتوگۆی لەسەر كراو، لایخۆیەوە وەزیری كشتوكاڵ و سەرچاوەكانی ئاو داوای زیادكردنی بنكەكانی وەرگرتنی كرد. لایخۆشیەوە كەمال مسلیم، وەزیری بازرگانی و پیشەسازی ئاماژەی بەوەكرد، ئامانجی هەردوولامان خزمەتكردنی خەڵكە، بۆیە لیژنەی نێوان هەردوولا كاراكرایەوە. لەدانیشتنەكە كە بریكاری وەزارەتی بارزگانی و پیشەسازی و ژمارەیەك بەڕێوەبەری هەردولا بەشدار بوون، گفتوگۆی وردكرا لەسەر دانانی میكانزمێكی تایبەت بەهاوردەكردنی ئەو بەرهەمانەی كە سیفەتی بازرگانی و كشتوكاڵیان هەیە. هەماهەنگی هەردوو وەزارەت بۆ پاراستنی بەرهەمی ناوخۆیی لە رێگەی لیژنەیەكی نێوان هەردوولا بڕیاری لەبارەوە درا.