بۆ یەكەم جارە لەسەر ئاستی وەزارەتەكانی حكومەتی هەرێمی كوردستاندا، وەزارەتی كشتوكاڵ و سەرچاوەكانی ئاو پێوەری هەڵسەنگاندن بۆ ئەوانەی فەرمانبەرن و سیستەمی دانانی بەڕێوەبەرو سەرۆك بەش و هۆبەكان لە سەرجەم دامەزراوو فەرمانگەكانی سەر بە وەزارەت پەیڕەو دەكات، دكتۆر ئەنوەر عومەر بەڕێوەبەری گشتی پلان و بەدواداچوون و وتەبێژی وەزارەت دەربارەی ئەم هەنگاوە روونی كردەوە كە بەپێی ئەم پێوەرە چەندین خاڵ دەست نیشانكراوە كە دوای پەیڕەوكردنیان ئینجا دەخرێتە واری جێبەجێ كردنەوە، دەربارەی گرنگترین ئەو خاڵانەی كە دەبنە بنەمای پێوەر بۆ ئەنجامدانی هەڵسەنگاندن و دانانی بەڕێوەبەر و سەرۆك بەش و هۆبەكان، وتەبێژی وەزارەت ئاماژەی بەوە كرد كە گرنگترین ئەو خاڵانە بریتین لە وەی كە ئەو بەڕێوەبەرە یان سەرۆك بەشەی دەست نیشان دەكرێت پێویستە ئاستی لێهاتوویی وەزیفی لەبار بێت هەروەها دەخرێتە كێبڕكێوە لەگەڵ هاوكارانی دیكەی، وێڕای بوونی بڕوانامەی گونجاو بۆ ئەو پۆستە، لەگەڵ رەچاوكردنی ساڵانی خزمەت، پێویستە شارەزایی تەواوی لە پسپۆڕییەكەی خۆی لەو شوێنە هەبێت، لە هەمان كاتیشدا بە هەموو ئەركەكانی سەرشانی پابەند بێت، دواتر خاوەن پاشخانێكی پاك و رەوشت بەرزبێت لە جێبەجێكردنی كارەكەیدا، وێڕای ئەم خاڵانەش، ساڵانە ئەو بەڕێوەبەر و سەرۆك بەش و هۆبانەی كە لە ئێستادا لەكاردان هەڵسەنگاندنیان بۆ ئەنجام دەدرێت، بە مەبەستی ئاشنابوون بە ئاستی سەركەوتن و توانای ئەدایان لە كارەكانیاندا، لە كۆتاییشدا وتەبێژی وەزارەت ئاماژەی بەوە كرد كە بۆ سەرخستنی ئەم پرۆسەیەو بەڕێوەبردنی كارەكان چەند لیژنەیەك چ لەسەر ئاستی وەزارەت یان لەسەر ئاستی بەڕێوەبەرایەتییە گشتییەكان و فەرمانگەكانی وەزارەت پێكدێت.