بێگەرد تاڵەبانى، وەزیرى کشتوکاڵ و سەرچاوەکانى ئاو، لە دیوانى وەزارەت پێشوازى کرد لە عەبدولستار مەجید، سەرۆکى فراکسیۆنى کۆمەڵى ئیسلامى لە پەرلەمانى کوردستان. کە بە مەبەستى پیرۆزبایى و دەربڕینى هاوکارى و پشتیوانى سەردانى وەزیرى کشتوکاڵى کردبوو. لە دیدارێکدا وەزیرى کشتوکاڵ بەخێرهاتنى سەرۆکى فراکسیۆنى کۆمەڵى ئیسلامى کرد و هیواى خواست حکومەت و پەرلەمانى کوردستان بتوانن وەک دوو دەسەڵاتى باڵاى ئەم هەرێمە هاوکار و هەماهانگ بن لەپێناو هەرچى زیاتر دەستەبەرى خۆشگوزەرانى بۆ دانیشتوانى ئەم هەرێمە و پەرەپێدانى هەمەلایەنەى وڵات. سەرۆکى فراکسیۆنى کۆمەڵ لە پەرلەمانى کوردستان، کە لە کابینەى پێشوودا وەزیرى کشتوکاڵ و سەرچاوەکانى ئاو بووە، وێراى پیرۆزبایى کردن لە وەزیرى نوێى کشتوکاڵ، دووپاتیکردەوە کە ئەزموونى کارکردنى خۆى لەم وەزارەتە و وەک پەرلەمانتاریش دەخاتە خزمەت پرۆسەى گەشەپێدانى کەرتى کشتوکاڵ لە هەرێمى کوردستان. وەزیرى کشتوکاڵ سوپاسى ئەو دەستپێشخەرییەى کرد و هیواى خواست هەمووان هاوکار و هەماهەنگ بن و هەردوو لا لەبارەى رەوشى کار و بەرنامەى وەزارەت و دۆخى کەرتى کشتوکاڵ و پلانەکان بۆ گەشەپێدانى ئەو کەرتە گفتوگۆیان کرد.