دوای ئەوەی حكومەتی عێراقی فیدڕاڵ و حكومەتی هەرێمی كوردستان لە ساڵانی رابردوو بڕیاریان دابوو كە هاوردەكردنی گۆشتی سووری مانگا قەدەغەبكرێت لەبەر ئەوەی مەترسیی هەڵگرتنی ڤایرۆسی نەخۆشیی شێتیی مانگای لێدەكرێت، لەم ماوەیەدا دەستەی راوێژكاریی سەلامەتیی خۆراك لە وەزارەتی تەندروستیی عێراق بڕیاری داوە جارێكی دیكە رێگە بدرێت گۆشتی سووری مانگا لە دەرەوە هاوردەبكرێت لە( ئەمریكا و بەڕازیل و هۆڵەندا)، بەڵام هەرێمی كوردستان بەهیچ شێوەیەك رێگە بەمە نادات، دكتۆر ئەنوەر عومەر قادر بەڕێوەبەری گشتیی پلاندانان و بەدواداچوون و وتەبێژی وەزارەتی كشتوكاڵ و سەرچاوەكانی ئاو ئەمەی پشتڕاست كردەوەو گوتی: بۆ پاراستنی گیانی هاووڵاتیانی هەرێمی كوردستان و دووركەوتنەوە لەمەترسیی بڵاوبوونەوەی نەخۆشیی شێتیی مانگا، وەزارەتی كشتوكاڵ و سەرچاوەكانی ئاو لە كۆبوونەوەی ئەنجومەنی راوێژكاریدا بڕیاری دا وەك هەرێمی كوردستان رێگە نادرێت لە هەموو مەرزو خاڵەكانی سنوورو بازگەكانەوە ئەم جۆرە گۆشتە بهێنرێتە نێو كوردستانەوەو لە بازاڕەكاندا بفرۆشرێت، بۆ ئەم مەبەستە هەموو كەڕەنتینەكان و لیژنەكانی چاودێری ئاگاداركراونەتەوە كە بەجیددی و وردییەوە ئاگاداری ئەم خاڵە بن و لە كاتی بوونی هەر حاڵەتێك رێكارو رێوشوێنی یاسایی بگرنەبەر.