ئەمڕۆ بەڕێز دكتۆر فوئاد مەعسوم سەرۆك كۆماری عێراقی فیدراڵ دواي سەردانێكیی چەند رۆژە بۆ هەرێمی كوردستان لە لایەن بەڕێز قوباد تاڵەبانی جێگری سەرۆكی حكومەتی هەرێمی كوردستان و كەریم شنگالی وەزیری ناوخۆو عەبدولستار مەجید وەزیری كشتوكاڵ و سەرچاوەكانی ئاو و مەولود باوە موراد وەزیری هەرێم بۆ كاروباری پەرلەمان و نەوزاد هادی پارێزگاری هەولێر بەڕێخرا. لە پەراوێزی رێوڕەسمی بەڕێخستنەكەداو لە دانیشتنێكدا باس لە رەوشی ئێستای عێراق و پەیوەندییەكانی نێوان هەولێر و بەغدا كراو جەختكرایەوە لەسەر چارەسەركردنی كێشەكانی نێوانیان بەپێی دەستوورو ئەو رێكەوتنەی لەم دواییە لەنێوان هەردوو حكومەتی هەرێمی كوردستان و عێراقی فیدڕاڵ ئیمزاكرا كە لە بەرژەوەندیی هەردوو لادایە، لە تەوەرێكی دیكەدا باس لە شەڕی نەخوازراوی تیرۆریستانی داعش دژی هەرێمی كوردستان و عێراق كرا، رۆڵی قارەمانانەی پێشمەرگەی كوردستان لە بەرگریكردن و رووبەڕووبوونەوەی تیرۆریستان لە بەرەكانی شەڕ بەرزنرخێنرا، هاوكات ئاماژە بە رۆڵی سوپای عێراق و هێزەكانی دیكەی عێراقیش كرا كە لەئێستادا لە شەڕی بەرگریكردن و راونانی تیرۆریستانی داعشدان.دواتر لەلایەن ئامادەبووانەوە بەڕێزسەرۆك كۆماری عێراق بە رێزو پێزانینەوە بەڕێخرا.