بەمەبەستی رێكخستن و زیاتر كاراكردنی كەرەنتینە كشتوكاڵییەكانی سەر سنوور لە پارێزگاكانی هەرێمی كوردستان و زیاتر گفتوگۆكردن لەسەر یاسای تایبەت بەو بوارە لە دیوانی وەزارەت بە ئامادەبوونی بەڕێزان عەبدولستار مەجید وەزیری كشتوكاڵ و سەرچاوەكانی ئاوو دكتۆر رێكەوت محەمەد رەشید وەزیری تەندروستی و دكتۆر عەلی سندی وەزیری پلاندانان و وەزیری بازرگانی و پیشەسازی بە وەكالەت و رابەر سدیق بریكاری وەزارەتی دارایی و ئابووری و ژمارەیەك لە پسپۆڕانی لایەنە بەشدارەكان بەڕێوەچوو، لە میانی كۆبوونەوەكەدا جەخت لەسەر ناوەڕۆكی ماددە(5)ی یاسای فیدڕاڵی نوێی كەرەنتینەی كشتوكاڵی ژمارە(6)ی ساڵی 2012 كرایەوە، دوای گفتوگۆی تێروتەسەل و خستنەڕووی سەرنج و تێبینییەكان لەلایەن وەزیرەكانەوە بڕیاردرا هەفتەی داهاتوودا لیژنەیەكی هاوبەش لە نوێنەرانی ئەو لایەنانە پێكبهێنرێت و كۆبوونەوەیەك لە دیوانی وەزارەتی كشتوكاڵ و سەرچاوەكانی ئاو تاكو بگەنە دیدگاو رایەكی یەكگرتوو لەسەر ئەو ماددەیەو كۆی پڕۆژە یاسایەكەو دواتر رێكبخرێتەوەو بۆ سەرۆكایەتی ئەنجومەنی وەزیران بەرزبكرێتەوەو لەوێشەوە بۆ پەرلەمانی كوردستان بنێردرێت.