لە چوارچێوەی لەنزیكەوە ئاوڕدانەوە لە جووتیاران بە گشتی و جووتیارانی نموونەیی و لێهاتوو بە تایبەتی، ئەمڕۆ بەڕێزعەبدولستار مەجید وەزیری كشتوكاڵ و سەرچاوەكانی ئاو بە ئامادەبوونی بەڕێوەبەری گشتی دیوان پێشوازی لە جووتیاری نموونەیی ئازاد محەمەد عەبدوڵا دانیشتووی ناحیەی سیروانی سەر بە پارێزگای هەڵەبجەی شەهید كرد، لەم دیدارەدا گوێی لە چالاكی و ئیش و كاری جووتیارەكە گرت و هەندێ نموونەی لە بەرهەمی جووتیارەكە بینی لە خەیارو كودی و باینجان و خۆخ و قەیسی و گەنمەشامی، وەزیری كشتوكاڵ و سەرچاوەكانی ئاو دەستخۆشی لێكرد و هیوای خواست زیاتر لە كارەكانی بەردەوام بێت و جووتیارانی دیكەش بە هەمان گیانی پیشەیی و بەرپرسیارێتییەوە كار بۆ زیادكردنی بەرهەم و هەمەجۆركردنی بكەن، جەختیشی لەوە كردەوە كە زۆر جاری دیكە داوای لە جووتیاران كردووە كە ئەوانەی خانووی پلاستیك بەكاردێنن تەنیا بە یەك جۆر سەوزە یان میوە داینەچێنن، بەڵكو هەمەجۆری بكەن تاكو بەرهەمی خۆماڵی لە هەموو وەرزو كاتەكاندا بەپێی توانا بۆ هاووڵاتیان دەستەبەربكرێت، دوای ئەوە رێزی لە جووتیار ئازاد محەمەد عەبدوڵا كە ناوبراو خاوەنی 18 خانووی پلاستیكە و جگە لەو بەرهەمانەی كە لەو خانووانە دەیانچێنێت، توانیویەتی دەرمانێك وەك چارەسەر بدۆزێتەوە بۆ لەناوبردنی (گیاكەڵە) كە جۆرە گیایەكی زیانبەخشە و لەسەر ڕیشی خەیارو تەماتە شین دەبێت و بەرهەمەكان دەفەوتێنێت.