ئەمڕۆ دوو شەممە 26-10-2015 بە چاودێریی بەڕێز عەبدولستار مەجید وەزیری كشتوكاڵ و سەرچاوەكانی ئاو و بە ئامادەبوونی سەرجەم بەڕێوەبەرانی گشتیی وەزارەت و كشتوكاڵی پارێزگای هەولێر و راوێژكاران و ، لەناو بەڕێوەبەرایەتیی توێژینەوەی كشتوكاڵی، رێوڕەسمی بەخشینی خەڵاتی رێزلێنان بۆ چەندین جووتیاری نموونەیی و كۆمپانیاو فەرمانبەرانی وەزارەت كە رۆڵی كارایان هەیە لە بواری بەرهەمهێنانی پەتاتە لە پارێزگاكانی هەولێرو سلێمانی و دهۆك و ئیدارەی گەرمیان بەڕێوەچوو، لە وتەیەكدا بەڕێز وەزیری كشتوكاڵ و سەرچاوەكانی ئاو سەرەتا پیرۆزبایی لەو كۆمەڵە جووتیارەو كۆمپانیاو فەرمانبەرانە كرد كە رۆڵی كارایان گێڕاوە لە بواری بەرهەمهێنانی پەتاتەو هاوردەكردنی بنەتۆی پەتاتە هیوای خواست كە جووتیارانی دیكەی پارێزگاكەو سەرجەم ناوچەكانی دیكەی هەرێمی كوردستان داهێنان بكەن و بەرهەم زیادبكەن، ئاماژەشی بە یاسای پاراستنی بەروبوومی جووتیاران كرد بە تایبەتیش دانانی باج لەسەر بەرهەمی هاوردە لە كاتی پێگەیشتنی بەرهەمی خۆماڵی و هاندانی جووتیارو بەرهەمهێنان تاكو زیاتر پرۆسەی كشتوكاڵ وەك سێكتەرێكی گرنگی ئابووریی كوردستان پێشبخەن، دواتر لەلایەن وەزیرو بەڕێوەبەرەگشتییەكان خەڵات و بڕوانامە بەخشرایە ( 52 ) جووتیاری نموونەیی لە بواری چاندنی پەتاتە و 6 كۆمپانیاش كە رۆڵیان هەبووە لە دابینكردنی بنەتۆی پەتاتەو پێداویستییەكانی و 18 فەرمانبەریش لە نێو وەزارەت و فەرمانگە كشتوكاڵییەكان، شایانی باسە لەئێستادا هەرێمی كوردستان لە بواری بەروبوومی پەتاتە گە یشتۆتە ئاستی خۆبژێوی كە ئەم ساڵ 140 هەزار تەن لەم بەروبوومە بەرهەم هاتووەو ساڵانە هەرێمی كوردستانیش لەگەڵ بوونی ئەو ژمارە ئاوارانەشەوە پێویستی بە 85- 90 هەزار تەن پەتاتەیە.