بەڕێزعەبدولستار مەجید وەزیری كشتوكاڵ و سەرچاوەكانی ئاو لە دیوانی وەزارەت سەرپەرشتی كۆبوونەوەیەكی لیژنەی هەماهەنگیی نێوان هەردوو وەزارەتی كشتوكاڵ و سەرچاوەكانی ئاوو خوێندنی باڵاو توێژینەوەی زانستیی كرد تایبەت بە پیادەكردنی ئەو رێكەوتننامە هاوبەشەی هەردوو وەزارەت لە ساڵی 2016 واژۆیان كرد، وەزیری كشتوكاڵ و سەرچاوەكانی ئاو لە نزیكەوە گوێی لە بۆچوون و هەنگاوەكانی لیژنەكە گرت بە ئاراستەی جێبەجێكردنی بڕگەو ناوەڕۆكی رێكەوتننامەكە، بە تایبەتیش سیاسەتی وەزارەت كە لەگەڵ ناوەندە زانستییەكان و سەرچاوەكانی زانیاریی زانستی پەیڕەوی دەكات بۆ ئەوەی سێكتەری كشتوكاڵ ببێتە ئەولەویەت لە قۆناغی پەرەپێدان و بەهێزكردنی بنەماكانی ئابووری، هاوكات ئەو بڕگەیەی كە پەیوەستە بە تەرخانكردنی كورسیی خوێندن بۆ ماستەر و دكتۆرا لە پسپۆڕییە جیاجیاكانی كشتوكاڵ بۆ كارمەندانی وەزارەت، وێڕای ئەو خاڵە گرنگ و سەرەكییەی كە تایبەتە بە توێژینەوەی زانستی و ئاوێتەكردن و سوودوەرگرتن لە تواناكانی پسپۆڕانی خوێندنی باڵا بۆ سەنتەرەكانی توێژینەوەی كشتوكاڵی سەر بە وەزارەتی كشتوكاڵ و سەرچاوەكانی ئاو، كە ئەمەش دەبێتە هۆی زیاتر بەهێزكردنی تواناو ئەدای ئەو سەنتەرانە. لە كۆبوونەوەكەدا بڕیاردرا كە لیژنەی هەماهەنگیی نێوان هەردوو وەزارەتی كشتوكاڵ و سەرچاوەكانی ئاوو خوێندنی باڵاو توێژینەوەی زانستیی تایبەت بە پیادەكردنی رێكەوتننامە هاوبەشەكەی نێوان هەردوولا لە كۆبوونەوەكانیان بەردەوام بێت تاكو بتوانرێت ئامانجەكانی ئەو رێكەوتننامەیە بپێكرێت بۆ بووژانەوەی زیاتری سێكتەری كشتوكاڵ كە بنەمای سەركیی ئابووریی هەرێمی كوردستانە.