وەزارەتی كشتوكاڵ و سەرچاوەكانی ئاو رەزامەندیی دا لەسەر دەستپێشخەرییەكی خۆبەخشانەی كۆمپانیای ( تاقە) كە لە بواری نەوت كاردەكات، تایبەت بە هاوكاریكردنی وەزارەت لەڕووی دابینكردنی ڤاكسین بۆ كوتانی ئاژەڵان دژی نەخۆشییەكانی تەبەقەو دەردەمەڕ كە لە پارێزگای دهۆك سەریان هەڵداوە، عەبدولستار مەجید وەزیری كشتوكاڵ و سەرچاوەكانی ئاو دەستخۆشیی لە كۆمپانیای ناوبراو كردو هیوای خواست لەو قەیرانە داراییەی ئێستای هەرێمی كوردستان كۆمپانیای دیكەو خەڵكی خێرخواز چاو لەو كۆمپانیایە بكات و خزمەت بە هاووڵاتیان و ئابووریی هەرێم بكەن، ئەم دەست پێشخەرییەش لە میانی كۆبوونەوەیەكدا خرایە ڕوو كە لە دیوانی وەزارەت لە نێوان ئەنوەر عومەر بەڕێوەبەری گشتیی پلان و بەدواداچوون و ئەنوەر دۆڵەمەڕی و خاتوو ئیما سپینس لە كۆمپانیای (تاقە) بەڕێوەچوو، لەمیانی كۆبوونەوەكەدا كۆمپانیای ناوبراو ئامادەیی خۆی دووپاتكردەوە كە هەردوو فاكسینی نەخۆشیی تەبەقە (FMD)و فاكسینی دەردەمەڕ(PPR) دابین بكات دوای پەیوەندیكردن بە بەڕێوەبەرایەتیی ڤێتێرنەریی دهۆك، شایانی باسە كۆمپانیای ( تاقە) لە دەڤەری ئەتروش لە بواری نەوت كاردەكات، بەڵام وەك خۆبەخشێك ئەو دەستپێشخەرییەی پێشكەش بە وەزارەت كردووە.