بێگەرد تاڵەبانی، وەزیری كشتوكاڵ و سەرچاوەكانی راگەیاند، پێداچوونەوە بە رێنماییە بەرکارەكاندا دەكات بەمەبەستی ئاسانكاریكردن و نەهێشتنی لەمپەرەكانی بەردەم بەشداریی کردنی كەرتی تایبەت لە جێبەجێکردنی پڕۆژەی وەبرهێنان بەتایبەت لە کەرتی کشتوکاڵ دا. ئەمرۆ یەك شەممە 8/9/2019، وەزیری كشتوكاڵ و سەرچاوەكانی ئاوی حكومەتی هەرێم لەگەڵ كۆمەڵەی بارزگانەكانی پێداویستی كشتوكاڵ كۆبووەوە. لەسەرەتای كۆبوونەوەكەدا سەرۆك و ئەندامانی كۆمەڵەكە سەرنج و پێشنیاریان لەسەر بەرێوەچوونی كارەكانیان خستە ڕوو، هەروەها داوایان كرد وەزیری كشتوكاڵ و سەرچاوەكانی ئاو بە هەماهەنگی لەگەڵ وەزارەتە پەیوەندارەكان رۆتینیاتی بەردەم وەبەرهێن و وەبەرهێنان نەهێڵێت. لای خۆیەوە بێگەرد تاڵەبانی، وەزیری كشتوكاڵ و سەرچاوەكانی ئاو رایگەیاند: پێداچونەوە بە رێنماییەكاندا دەكات بۆ ئەوەی لەچوار چێوەی یاسا بەركارەكان ئاسانكاریی بۆ كەرتی تایبەت بكرێت لە بووژانەوەی زیاتری كەرتی كشتوكاڵ و پاراستنی سامانی ئاژەڵ و ئاو. وەزیری كشتوكاڵ بەڵێنیشی پێدان كە لەچوار چێوەی دەسەڵاتی وەزیری كشتوكاڵ رۆتینیاتی بەردەمیان ناهێلێت و بە هەماهەنگیش لەگەڵ وەزارەتە پەیوەندارەكان کار دەکات لە پێناو ئاسانكاریی زیاتر بۆ كەرتی تایبەت و هەرچی زیاتری بەشداریی ئەو کەرتە لە گەشەپێدانی کشتوکاڵ و زیاد کردنی بەرهەمی خۆماڵی. هەروەک دووپاتیشی كردەوە، كە دەرفەتی یەکسان بۆ سەرجەم كۆمپانیا مۆڵەت پێدراوەكان دەرەخسێنن و لەمەودوا هەمووان بەیەک چاو سەیردەكرێن و دەرفەت و هەلی یەکسانیان بۆ دەرەخسێنرێت.