وتەبێژی وەزارەتی كشتوكاڵ و سەرچاوەكانی ئاو رایگەیاند كە ئاستی هەناردەكردنی هەندێ بەروبوومی توركیا ئەم ساڵ لەچاو ساڵی 2014 بەرێژەیەكی بەرچاو بۆ هەرێمی كوردستان كەمی كردووە، دكتۆر ئەنوەر عومەر قادر بەڕێوەبەری گشتیی پلان و بەدواداچوون لەوەزارەتی كشتوكاڵ و سەرچاوەكانی ئاو و وتەبێژی وەزارەت روونی كردەوە كە دوای ئەوەی لەرۆژی 16ی ئەم مانگە، شاندێكی وڵاتی توركیا و یەكێتیی هاوردەكاران و گروپەكانی پەلەوەڕ سەردانی بەڕێز عەبدولستار مەجید وەزیری كشتوكاڵ و سەرچاوەكانی ئاویان كرد لە دیوانی وەزارەت، شاندەكە رایگەیاندبوو كە ئاستی هەناردەكردنی بەروبوومی توركیا لە ساڵی 2015 بۆ هەرێمی كوردستان دابەزیوە لە راپۆرتێكیاندا كە بەم بۆنەیەوە ئامادەیان كردووە ئاماژە بەوە دەكەن كە لە سەرەتای ساڵی 2015 تاكو مانگی تشرینی دووەمی 2015 بەم رێژەیە بەروبوومی كشتوكاڵی دابەزیوە بەبەراورد لەگەڵ ساڵی 2014: 1- گوڵەبەڕۆژە 13% 2- گۆشتی سوور و پەلەوەڕ( فرێش و بەستوو) 33% 3- هێلكە 40% وتەبێژی وەزارەت دووپاتیشی كردەوە كە ئەمەش بەڵگەی ئەوەیە بەروبوومی خۆماڵی لە ساڵی 2015 زیادی كردووە لە بەرامبەر 2014.