بەڕێز عەبدولستار مەجید وەزیری كشتوكاڵ و سەرچاوەكانی ئاو پێشوازی كرد لە جۆن فرانسوا میگابی راوێژكاری ئابووری لە كونسوڵخانەی فەرەنسی لە هەرێمی كوردستان و شاندێك كە لە ژمارەیەك بەڕێوەبەرو نوێنەرانی كۆمپانیای فەرەنسی پێكهاتبوو، لە دیدارێكدا كە ژمارەیەك بەڕێوەبەرانی گشتیی وەزارەت ئامادەی بوو، ئامانجی ئەو سەردانە روون كرایەوە كە بریتی بوو لە پڕۆژەی بەخێوكردنی مانگاو بەرهەمهێنانی شیر لە هەرێمی كوردستان لەرێی وەبەرهێنانەوە ئەنجام بدرێت، لەلای خۆیەوە وەزیری كشتوكاڵ و سەرچاوەكانی ئاو خۆشحاڵی خۆی و پشتگیریی تەواوی بۆ ئەم پڕۆژەیە دووپاتكردەوە و پێشنیارێكی دیكەشی خستە بەردەم شاندی كۆمپانیاكان كە ئەگەر بە رێگایەكی دیكە ئەم كارە بكەن كە بریتییە لەوەی ئەو كۆمپانیایانە چەند مانگایەك بەسەر جووتیاراندا دابەش بكەن و بە پێی گرێبەست رۆژانە بەرهەمی شیرەكانیان لێ وەربگرن و ئەوان لەرێی كارگەی شیرەوە بەرهەمی ماست و پەنیر و جۆرەكانی دیكەی لێ درووست بكەن وەزارەتیش چاودێریی پرۆسەكە بكات، لەم بارەوە بەڕێز عەبدولستار مەجید تەواوی ئامادەیی خۆی بۆ ئاسانكاری و سەرخستنی ئەم بیرۆكەیە خستەڕوو، جەختیشی لەوە كردەوە كە لە هەرێمی كوردستان پێویستی زۆرمان بەم جۆرە پڕۆژانە هەیە تاكو بتوانین زیاتر خزمەت بە جووتیاران بكەین.