ئەمڕۆ یەك شەممە 7-6-2015 بە ئامادەبوونی بەڕێز عەبدولرەحمان عەبدولرەحیم وەزیری هەرێم بۆكاروباری ژینگە وەزیری كشتوكاڵ و سەرچاوەكانی ئاو بە وەكالەت و بەڕێوەبەرانی گشتی و ژمارەیەكی زۆری كارمەندو فەرمانبەرانی وەزارەت، لە بەشی دارستانی كەسنەزان لە هەولێر هەڵمەتی نیشتمانی پاككردنەوەی دارستانەكان لە هەرێمی كوردستان دەستی پێكرد كە بەڕێوەبەرایەتی گشتیی باخداری و دارستان و لەوەڕگاكان سەرپەرشتی دەكات، سەبارەت بە ئەنجامدانی ئەم هەڵمەتە وەزیری هەرێم بۆكاروباری ژینگە وەزیری كشتوكاڵ و سەرچاوەكانی ئاو بە وەكالەت لە لێدوانێكدا بۆ ئاژانسەكانی هەواڵ و میدیاكان روونی كردەوە كە ئەم هەڵمەتە بە هەنگاوێكی گرنگی پاراستنی سامانی دارستان و ژینگە دەژمێردرێت، هاوكات هەوڵێكی جیددیە بۆ پارێزگاری كردن لە رووداوەكانی ئاگركەوتنەوە كە لەم وەرزەدا رووبەرێكی زۆری دارستان و پاوانەكان دەگرێتەوەو زیانێكی زۆر بە ژینگەو ئەم سامانە سروشتییە دەگەیەنێت، دووپاتیشی كردەوە كە ئەم هەڵمەتە بە توانای كارمەندان و فەرمانبەرانی دامودەزگاو فەرمانگەكانی وەزارەت و خێرخوازان و هاووڵاتیانی دڵسۆز ئەنجام دەدرێت و لەبەر ئەوەی كە قەیرانی دارایی لە ئارادایە، بۆیە تا ئێستا رەزامەندی نەدراوە بە تەرخانكردنی بودجەیەك بۆ ئەنجامدانی ئەم هەڵمەتەو بەكرێگرتنی كرێكار بۆ پاككردنەوەی دارستان و پاوانەكان، داواشی لە میدیاكان كرد كە لە ئاست بەرپرسیارێتیی ئەم هەڵمەتەدا بن و لە رووی راگەیاندنەوە بەشداری بكەن لە زیاتر بڵاوكردنەوەی هۆشیاریی لە نێو هاووڵاتیان بە مەبەستی ئاگاداربوون لە گرنگیی هەڵمەتەكە و گەیاندنی پەیامەكە بە شێوەیەكی دروست و پێكانی ئامانجە سەرەكییەكە كە بریتییە لە پارێزگاری كردن لەم سامانە سروشتییە، شایانی باسە هەڵمەتی نیشتمانی پاككردنەوەی دارستانەكان سەرجەم پارێزگاو شارو شارۆچكەكانی هەرێمی كوردستان دەگرێتەوەو ماوەی هەفتەیەك بەردەوام دەبێت.