بەڕێز عەبدولستار مەجید وەزیری كشتوكاڵ و سەرچاوەكانی ئاو پێشوازی كرد لە خاوەن فرۆشگاكانی مریشك لە هەولێر و سلێمانی و گەرمیان، لە دیدارەكەدا كە بەڕێوەبەرانی گشتیی دیوان و پلان و بەدواداچوون و سامانی ئاژەڵ و ڤێتێرنێری ئامادەی بوون، سەرەتا گوێی لە راوبۆچوونی نوێنەران گرت دەربارەی بەو رێنماییانەی كە لەماوەی رابردوودا تایبەت بە بەرەنگاربووونەوەی نەخۆشیی پەلەوەڕ بڵاوكرایەوە، ئەوان سووربوون لەسەر ئەوەی كە ئەم بڕیارانە زیان بە گوزەرانی چەندین خێزان دەگەیەنێت كە ژیانیان لەسەر بژێوی ئەو دوكانانەیە، داواشیان كرد كە لیژنەی باڵای بەرەنگاربوونەوەی چاو بەو بڕیارەدا بخشێنێتەوە، لە وەڵامیشدا وەزیری كشتوكاڵ و سەرچاوەكانی ئاو روونی كردەوە كە ئەم بڕیارە لە لایەن لیژنەی باڵاوە دەرچووە نەك بە تەنیا وەزارەتی كشتوكاڵ و سەرچاوەكانی ئاو، هەروەها ئاماژەی بەوە دا كە ئەو بڕیارانە لە بەرژەوەندیی هەموو هاووڵاتیاندایە كە بۆ پاراستنی ژیانیان و بەرژەوەندیی خودی خاوەن فرۆشگاكانی مریشكە، جەختی لەوەش كردەوە كە لەم ماوەیەدا وەزارەت رێنمایی دەردەكات بە راوێژ لەگەڵ وەزارەتە پەیوەندیدارەكان بۆ رێكخستن و بە سیستەمكردنی ئەم كارە و لە داهاتوو ئەوانەی مۆڵەت وەردەگرن دەچنە ناو سیستەمی بە بازاڕكردنی مریشك كە وەزارەت لە ئەستۆی دەگرێت و ئەو كاتە بۆیان هەیە مریشكی فرێش و بەستووش بفرۆشن.لەلای خۆیانەوە نوێنەرانی فرۆشگاكانی مریشك سوپاسی هەڵوێستی وەزارەتیان كرد و ئومێدیان خواست كە بە جیددی بەدواداچوون بۆ ئەو داواكارییانەیان بكەن.