بێگەرد تاڵەبانی: وەرزی داچاندنە و ئاسانكاری بۆ هاتوچۆی جوتیاران دەكەین ئەمڕۆ یەك شەممە 2020،4،12، بێگەرد تاڵەبانی، وەزیری كشتوكاڵ و سەرچاوەكانی ئاو سەردانی فرسەت سۆفی، پارێزگاری هەولێری كرد، لەكۆبوونەوەیەك جەختكرایەوە لەسەر ئاسانكاری بۆ هاتوچۆی جوتیاران و خاوەنكارانی كەرتی كشتوكاڵی. لەسەرەتای كۆبوونەوە، فرسەت سۆفی، پارێزگاری هەولێر دوای بەخێرهاتنی وەزیری كشتوكاڵ و شاندی یاوەری كورتە باسێكی لەسەر ئاسانكاریەكانی ژووری ئۆپەراسیۆنی پارێزگاری هەولێر كرد بۆ خاوەنكارانی كەرتی كشتوكاڵی. پاشان بێگەرد تاڵەبانی، وەزیری كشتوكاڵ و سەرچاوەكانی ئاو، سوپاسی ژووری ئۆپەراسیۆنی پارێزگای هەولێری كرد بۆ ئاسانكاری هاتوچۆكردن بۆ جوتیاران و خاوەنكارانی كەرتی كشتوكاڵی و وتی، ژووری ئۆپەراسیۆنی پارێزگاو ئیدارە سەربەخۆكان رۆڵێكی زۆر باشیان هەبوو لە ئاسانكاری بۆ جوتیاران و خاوەنكارانی كەرتی كشتوكاڵ و ئاودێری. وەزیری كشتوكاڵ و سەرچاوەكانی ئاو، باسی لەوەشكرد، ئێستا كە وەرزی داچاندن و پێگەیشتنی بەرهەمی خانووی پلاستیكی و بەرهەمی كێڵگە پەلەوەریەكانە، بۆیە پێویستە ئاسانكاری تەواو بۆ سەردانی خاوەنكارانی كەرتی كشتوكاڵی و ئاودێری بكرێت، هەروەها بتوانن بەرهەمەكانیان بگەیننە بازاڕ بە جێبەجێكردنی رێنمایەكانی خۆپارێزی. لە دانیشتنەكە جێگری پارێزگاری هەولێر و بەڕێوەبەرە گشتیەكانی وەزارەتی كشتوكاڵ و سەرچاوەكانی ئاو ئامادەبوون، تیشكخرایە سەر چارەسەركردنی كێشەی جوتیاران، هەنگەوان، خاوەن ئامێرەكانی دەڕاسە، كلینیكە ڤێتێرنەریەكان، كارگەكانی ئالیك، كێڵگەكانی پەلەوەر و نەمامگاكان. لە كۆتای كۆبوونەوەی هەماهەنگی بەردەوامی نێوان وەزارەت و پارێزگای هەولێر بە پێویستزانرا لەپێناو خزمەتكردنی خاوەنكارانی كەرتی كشتوكاڵی و ئاودێری.