بەڕێز عەبدولستار مەجید وەزیری كشتوكاڵ و سەرچاوەكانی ئاو بە یاوەریی ژمارەیەك لە بەڕێوەبەرانی گشتی وەزارەت سەردانی كۆلیژی كشتوكاڵی زانكۆی سەلاحەدینی كردو لە كۆبوونەوەیەكدا بە ئامادەبوونی پرۆفیسۆر سەردار یاسین سەرداری راگری كۆلیژو ئەندامانی ئەنجومەنی كۆلیژەكە و مامۆستایان، چەندین تەوەر قسەو باسی دەربارەكرا، لەوانە هەماهەنگی و هاوكاریی زانستی لە نێوان وەزارەت و كۆلیژی كشتوكاڵی زانكۆی سەلاحەدین كە لەماوەی رابردوودا بە تەواوی هاوئاهەنگ بوونە لەم بوارەدا و هەڵسەنگاندنیشیان بۆ ئەم بوارە ئەرێنی بووە، وەزیری كشتوكاڵ و سەرچاوەكانی ئاو روونی كردەوە كە لیژنەیەك لە وەزارەت پێكهاتووە بۆ پەیوەندی كردن لەگەڵ سەرجەم كۆلیژەكانی كشتوكاڵ و دانانی پڕۆژەیەك بۆ ئەوەی بە كردەنی ئەم هاوكاری و لێكتێگەیشتنە پەرەی پێ بدرێت، لەلایەكی دیكەوە جەختكرایەوە لەسەر ئامادەكردنی توێژینەوە بۆ ئەنجامدانی هەر پرۆژەیەك كە پوختەی ئەو توێژینەوە كشتوكاڵییە بۆ وەزارەت رەوانەبكرێت تاكو دواتر ببێتە رێنمایی و سوود بە جووتیاران و پەیوەندیداران بگەیەنێت، لە تەوەرێكی دیكەدا هەردوو لا رێككەوتن لەسەر ئەوەی كە ئەندامێكی ئەنجومەنی كۆلیژی كشتوكاڵی زانكۆی سەلاحەدین ببێتە ئەندام لە ئەنجومەنی راوێژكاریی وەزارەت و لە كۆبوونەوەكانیدا ئامادەبێت، هاوكات نوێنەرێكی راوێژكاری وەزارەت لە كۆبوونەوەی ئەنجومەنی كۆلیژەكە ئامادەبێت، مەبەستیش لەمە زیاتر هەماهەنگی و هاوكاری و خزمەتكردنی رەوشی كشتوكاڵی لە هەرێمی كوردستان، لە كۆتایی كۆبوونەوەكەدا رێككەوتن لەسەر بەردەوام هەماهەنگی كردن و گفتوگۆكردن بە مەبەستی زیاتر برەودان بە پرۆسەی كشتوكاڵ، لە لای خۆشیەوە راگری كۆلیژی كشتوكاڵی زانكۆی سەلاحەدین و ئەندامانی ئەنجومەنی كۆلیژەكە دووپاتیان كردەوە كە ئەوان بەردەوام هەماهەنگی دەكەن و كێشەكانی پەیوەست بە بوارە جیاجیاكانی كشتوكاڵ چارەسەر دەكەن.