بەڕێز عەبدولستار مەجید وەزیری كشتوكاڵ و سەرچاوەكانی ئاو لەمیانی كۆبوونەوەی لیژنەی بەدواداچوونی كێشەكانی جووتیاراندا بە ئامادەبوونی ئەندامانی لیژنەكە، وێڕای بەخێرهێنانی ئامادەبووان دووپاتی كردەوە كە مەبەستی وەزارەت لەو كۆبوونەوانەی رۆژانی سێ شەممە ئەوەیە كە لە نزیكەوە بە كێشەو داواكاریی جووتیاران ئاشنابێت و بەپێی توانا چارەسەریان بۆ دەستنیشان بكات، لە كۆبوونەوەكەی ئەم جارەشدا چەندین كێشەی تایبەت بە زەویی كشتوكاڵی و پرسی بیرلێدان و موڵكییەت و خاوەندارێتیی زەوییەكان خرانەڕوو، دوای گوێگرتن و ئاشنابوون بە بەڵگەو دۆسێیەكانی ئەو داواكاری و كێشانە، لیژنەكە بە وردی لێیانی كۆڵییەوەو بەپێی پسپۆڕی و لایەنی پەیوەندیدار رێگەچارەی بۆ دەست نیشان كردن، لەلای خۆشیانەوە جووتیاران سوپاسی جەنابی وەزیر و لیژنەكەیان كرد كە لە خەمی داواكارییەكەیاندایەو هیوای بەردەوامی و سەركەوتنیان بۆ خواست.