بەڕێزعەبدولستار مەجید وەزیری كشتوكاڵ و سەرچاوەكانی ئاو جەختی لەوە كردەوە كە وەزارەت هەمیشە بەتەنگ كێشەو داواكاریی جوتیارو خاوەن پڕۆژەكان هەیە و بەردەوام ئەو بڕیارو رێنماییانە دەردەكات كە لە بەرژەوەندیی ئەواندایە، ئەمەش لە میانی كۆبوونەوەی لیژنەی بەدواداچوونی كێشەكانی سەر بە وەزارەتدا هات كە رۆژانی سێ شەممە لەگەڵ جووتیارو بەرهەمهێنان ئەنجامی دەدات، وەزیری كشتوكاڵ و سەرچاوەكانی ئاو روونی كردەوە كە وەزارەت بەردەوامە لە بەدواداچوونی ورد بۆ داخوازی و كێشەكان، لەم رووەوە ئاماژەی بەوەكرد كە لەئێستادا حكومەتی عێراق بە بیانووی مەترسیی بڵاوبوونەوەی ئەنفلەوەنزای باڵندە لێناگەڕێت كە بەروبوومی پەلەوەڕی هەرێمی كوردستان بگاتە ناوچەكانی ژێر دەسەڵاتی خۆیەوە، بەڵام سەرباری ئەوە، ئێمە هەر لە هاوكاری و پشتیوانیكردنی خاوەن پڕۆژەكانی پەلەوەڕو جووتیاران بەردەوام دەبین، دواتر گوێبیستی كێشەكان بوو، لەوانە كێشەی زەویی جووتیاران خرایەڕوو باسیان لێوەكرا، ئەمە وێڕای كێشەی بیرلێدان كە سەرنج و تێبینی دەربارەی ئەم كێشەیەش ئاماژەیان پێكرا، لەم بارەوە جەختكرایەوە كە ئەو باباتە پێویستە بەپێی رێنماییەكان چارەوسەربكرێت تاكو زیان بە ئاوی ژێرزەوی نەگات و ئاستی ئاو كەم نەكات یان زیاتر بكات، وێڕای چەندین كێشەی دیكە چارەی گونجاویان بۆ دەست نیشان كرا.