هەردوو بەڕێوەبەرایەتى ڤێتێرنەرى هەولێر و سلێمانى لە وەزارەتى کشتوکاڵ و سەرچاوەکانى ئاو چەند رێکارێکیان گرتۆتەبەر لەپێناو رێگرى لە بڵاو بوونەوەى ڤایرۆسى کۆرۆنا. دکتۆر ئارى سەلاحەدین، بەڕێوەبەرى ڤێتێرنەرى سلێمانى بە سایتى وەزارەتى کشتوکاڵ و سەرچاوەکانى ئاوى رایگەیاند: لەگەڵ پزیشک و کارمەندانى بەڕێوەبەرایەتیەکە و کەرەنتینەى دەروازەى باشماخ پاککەرەوەى جۆرى ڤێرکۆنمان بۆ دەروازەکە و نوسینگەکان دابینکرد، هەروەها زانیارى و رێنمایانداوە بە کۆمپانیایى پاککردنەوە لە دەروازەکە لەگەڵ شوفێرانى بارهەڵگر کى لە سنورەکە پێداویستى هاوردە دەکەن. لایخۆشیەوە دکتۆر مامەند محەمەد، بەڕێوەبەرى ڤێتێرنەرى هەولێر بۆ سایتى وەزارەتى کشتوکاڵ و سەرچاوەکان ئاو وتى، لەگەڵ پزیشک و کارمەندانى بەڕێوەبەرایەتیەکە و ستافى بەڕێوەبەرایەتى سەربڕخانەى هاوچەرخى هەولێر هەڵمەتێکى فراوانمان دەست پێکردووە بە رشاندنى سەربڕخانەکان بۆ ئەوەى رێگرى بکەین لە بڵاوبوونەوەى ڤایرۆسى کۆرۆنا. بێگەرد تاڵەبانى، وەزیرى کشتوکاڵ و سەرچاوەکانى ئاو لەپەڕەى تایبەتى خۆی لە تۆڕى کۆمەڵایەتى فەیس بووک سوپاس و پێزانینى ئاراستەى هەردوو بەڕێوەبەرایەیتەکە کردووە کە ئەم هەنگاوانەیان گرتۆتەبەر لەپێناو تەندروستى هاوڵاتیان. وەزیرى کشتوکاڵ و سەرچاوەکانى ئاو ئاماژەى بەوەشکردوە، سەرەڕاى پشووى خۆپارێزى، بەڵام تیمەکانى هەردوو بەڕێوەبەرایەتیەکە لەخۆبردوانە بەردەوامن لەکارەکانیان ئەمەش جێگەى پێزانینە.