لەرۆژی جیهانی چیادا، وەزارەتی كشتوكاڵ و سەرچاوەكانی ئاو بەهەماهەنگی دەستەی پاراستن و چاككردنی ژینگە هەڵمەتێكی فراوانی چاندنی بەڕووی راگەیاندو ماوەی هەفتەیەك بەردەوام دەبێت. حوسێن حەمە كەریم، بەڕێوەبەری گشتی باخداری، دارستان‌و پاوان و وتەبێژی وەزارەتی كشتوكاڵ و سەرچاوەكانی ئاو رایگەیاند" ئەمڕۆ چوار شەممە 11ی كانوونی یەكەم وەزارەتی كشتوكاڵ و سەرچاوەكانی ئاو بەهەماهەنگی دەستەی پاراستن و چاككردنی ژینگە هەڵمەتێكی فراوانی چاندنی بەڕووی راگەیاند". وتەبێژی وەزارەتی كشتوكاڵ و سەرچاوەكانی ئاو باسی لەوەشكرد، هەڵمەتەكە ماوەی هەفتەیەك بەردەوامی دەبێت و سەرتاسەری كوردستان دەگرێتەوە. حوسێن حەمە كەریم باسی لەوەشكرد، ئەوەی جێگەی خۆشحاڵیمان بوو ژمارەیەكی زۆر لە بەرپرسانی یەكە ئیداریی یەكان و فەرمانگاكان وپۆلیسی دارستان وژینگەو ڕێكخراوەكانی ژینگەپارێز و وێندكاران ئامادەی هەڵمەتەكە بوون. لەم رۆژەدا وتەبێژی وەزارەتی كشتوكاڵ و سەرچاوەكانی ئاو پەیامی وەزارەتەكەی خستەڕوو كە بریتیە لە پارستنی دارستانە سروشتی یەكان وهاوكاری تەواوی هاووڵاتیانە بۆ زیاتر سەوزكردنی كوردستان، هەروەها ئەم هەڵمەتە ببێتە كلتورێك لای هەموان بۆ ئێستاو ئایندە كەگرنگی بە چاندنی بەڕوو بدرێت. درەختی بەڕوو لە ٨٥% كۆی دارستانە سروشتی یەكانی كوردستان پێكدەهێنێت وەك سیمبولی كورد وێناكراوە. رێكخراوی نەتەوە یەكگگرتوەكان رۆژی 11ی كانوونی یەكەمی وەك رۆژی جیهانی چیا دیاریكردووە.